Bagong dyowa ni Yilmaz kamukha ni Angelina Jolie

Column: Seen Scene
Author: Pilipino Star Ngayon

Seen: Look-alike ni Angelina Jolie si Zuleyka Rivera Mendoza, ang babae na nakunan ng litrato habang ka-date si Yilmaz Bektas, ang asawa ni Ruffa Gutierrez. Si Zuleyka ang nanalo ng Miss Universe crown noong 2006 at siya ang sinasabing bagong kasintahan ni Yilmaz.

Scene: Amoy-gimik para sa kanilang pelikula ang mga tsismis tungkol kina Jean Garcia at Polo Ravales. Magkatambal ang dalawa sa Love Is All That Matters. Umabot sa Pilipinas ang tsismis na nakita na sweet sina Polo at Jean nang magbakasyon sila sa Hong Kong. Naghamon si Polo na maglabas ng ebidensya ang mga nang-iintriga sa kanila ni Jean. Voila! Lumabas ang mga litrato ng kanilang intimate moments sa Hong Kong. Invasion of privacy ang reklamo nina Jean at Polo. Headline sa mga diyaryo na nais ni Polo na magdemanda. Binabanggit na ang title ng pelikula nina Jean at Polo sa mga interbyu sa kanila.

Seen: Sinalubong si Gabby Concepcion sa Centennial Airport ng production staff ng mga talk-show ng ABS-CBN. Kumpirmasyon ito na exclusive sa ABS-CBN ang kanyang TV appearances. Hindi na kilala si Gabby ng mga kabataan na isinilang noong 1995. Tatay ni KC Concepcion ang pagkakakilala nila sa kanya.

Scene : Ipalalabas ng ABS-CBN ang director's cut ng Marina. Mag-uumpisa ito ngayong umaga sa ganap na 10:00 am. Si Claudine Barretto si Marina, ang top-rating fantaserye ng ABS-CBN noong 2004. Sirena si Marina at sa muling pagpapalabas nito, maaaring mabawasan ng ABS-CBN ang pananabik ng publiko sa Dyesebel ng GMA 7. Tuluy-tuloy ang network war.

Seen: Nagkaroon ng milagro sa buhay ng Viva Hotman na si Paolo Serrano. Naglaho sa internet ang kopya ng kanyang sex scandal video. Maaari nang sabihin ni Paolo na hindi totoo ang tsismis o look-alike niya ang lalake sa malaswang video dahil burado na ang ebidensya.

Scene: May sawa factor si Janina San Miguel. Hindi na nakakaaliw na panoorin at pakinggan ang kanyang English grammar na mali-mali. Hindi siya naiiba kina Angelica Jones at Alyssa Alano. Matindi ang pressure kay Janina para mapatunayan na karapat-dapat ang beauty title na ipinagkaloob sa kanya.

Source: The Philippine Star