Goodbye Marky Cielo!

Author: Sun.Star
Column: Davao, Kalingawan

TALIWALA sa kalampusan sa Pambansang Kamao nga si Manny Pacquiao batok kang 'Golden Boy' Oscar De La Hoya niadtong Dominggo, nagsubo sab ang showbiz world.

Una pa man ang away ni Manny, kaadlawon niadtong Dominggo, namatay ang young actor nga si Marky Cielo sa edad nga 20 anyos.

Wa pa masayri sa mga doktor ang tinuod nga hinungdan sa kamatayon ni Marky apan ang ulitawo, napalgan na lamang nga wa na'y kinabuhi sud sa iyang lawak sa ilang balay didto sa Antipolo City.

Tungod niini, nagsuspetsa ang mga doktor nga acute hemorrhagic pancreatitis ang gikamatyan sa young actor.

Sumala sa taho, mga alas 6:00 sa buntag niadtong Dominggo, ang inahan ni Marky nga si Mildred Cielo, misaka sa iyang lawak aron pukawon ang young actor. May charity event daw kini nga adtoan. Apan wa na mimata pa ang young actor.

Gisuwayan pa sa pagdala sa Antipolo Doctors Hospital ang young actor apan gideklara siyang dead on arrival.

Si Marky, usa ka produkto sa GMA-7 StarStruck Batch 3 (The Nationwide Invasion) diin siya midaog isip Ultimate Sole Survivor niadtong 2005.

Siya ang labing unang Igorot gikan sa siyudad sa Baguio nga miapil sa Starstruck.

Ka-batch ni Marky sila si Iwa Moto, Jackie Rice ug Gian Carlo.

Human sa StarStruck, nakita siya sa daghang shows sa GMA nga naglakip sa Encantadia, Fantastikids, Bakekang, Asian Treasures, Boys Nxt Door, Kaputol ng Isang Awit, ug Codename: Asero.

Apan labaw siyang nailhan nga Zaido Green sa Zaido: Pulis Pangkalawakan. Mainstay sab siya sa musical-variety show sa SOP sa primetime series nga La Lola.

Ang young actor, usa ka first year Architecture student sa St. Louis University sa Baguio City dihang niapil kini og StarStruck.

Plano pa unta ni Mark nga mobalik sa pagtuon next year apan di na gyud kini karon mahinayon.

Duha ka adlaw lamang ang haya ni Marky sa Antipolo diin gidid-an ang mga fans sa pagduaw aron mahatagan og privacy ang iyang pamilya.

Human niini, dad-on ang lawas ni Marky sa Bontoc, Mountain Province, diin siya midako.

Source: Sunstar Daily