Heart out na sa movie ng Star Cinema

Column: About Showbiz
Author: Pilipino Star Ngayon

Si Anne Curtis pala ang bidang babae sa Ba­ler, entry ng Viva Films sa 2008 Metro Manila Film Festival. Biggest movie break ito ng actress at kapag naging box-office hit, hindi na niya masasabing mas kilala at tanggap siyang TV star than a movie star.

Sa isang interview kay Anne, naireklamo nitong kahit marami na siyang pelikulang ginagawa, TV star at hindi movie star daw ang tingin sa kanya ng tao, kaya kailangan niya ng matinding movie project para makilala na siyang "actress. "

Dumating na ang hini­hintay nitong project, ang Baler  na ang original title ay The Siege of Baler and from the script of Roy Igle­sias and to be direct­ed by Mark Meily.

* * *

Nasa ICU ng St. Luke's Medical Center si direk Gilbert Perez at balita namin, dumaan ito sa angiogram at  doon na­kita ang lagay ng kanyang puso. Wala kaming balita kung tigil muna ang taping ng soap na A Time For Us  o tuloy at ibang direc­tor muna ang pinahawak.

Unang nagkasakit kay direk Gilbert si Jericho Rosales, ang lead actor sa soap. Gaya kay Gary Valenciano ang naging sakit nito na viral parasitic, na-ospital din ang actor, pero kinailangang luma­bas dahil may schedule taping for the said soap. Mabuti na lang daw at nag­tuluy-tuloy ang pag­ga­ling ng actor at dahil doon, sobrang ingat na ito sa sarili.   

* * *

Matutuwa si Jennica Garcia sa magandang feedback sa acting niya sa Ako si Kim Samsoon as Eliza, ang younger sister ni Kim (Regine Ve­asquez). Kering-keri ng young actress, mapa-dra­ma at mapa-comedy at nakikipagsabayan siya kay Songbird at Ms. Tessie Tomas.

Sa acting na ipinapa­kita ni Jennica, hindi hala­tang nabubulol siya sa nerbyos 'pag kaeksena ang dalawa. Hindi rin nito ini-expect na comedy ang role na ibibigay sa kanya't, sa drama siya nalilinya.

 Hindi nawawalang itanong kay Jennica ang tungkol sa relasyon ni Jean Garcia at Polo Ravales, pero sabi nito, kahit sino ang mahalin ng ina ay payag siya, basta masaya ito. Hindi rin daw totoong against siya sa mga nagiging boyfriend ng ina.

 "Lagi nga akong nag-a-adjust. Ayaw ko man o gusto sa mapipili niya, bilang anak at mommy ko, siya pa rin ang mas nakakaalam. Pero, 'pag may nakita akong mali, very vocal ako sa pagsasabi, pero 'di ako nakikialam, basta walang mananakit sa mom ko," sabi ni Jennica.

* * *

Out na sa cast ng Tanging Ina N'yong Lahat  si Heart Evangelista dahil Kapuso na ito at ang Star Cinema na movie arm ng ABS-CBN ang  producer ng pelikula. Pinalitan siya ni Paula Peralejo na nagka-comeback sa nasabing pelikula at gaganap sa role ni Portia.

 Wala na rin si Carlo Aquino dahil ang Viva Artist Agency na ang nagma-manage sa kanya at sa shows ng GMA 7 siya regular na napapanood. Sayang, isa ang character niya sa tumatak sa moviegoers sa original movie.

 Pero bakit si Marvin Agustin, kinuha pa rin kahit exclusive na sa Channel 7 at GMA Artist Center talent siya? Pinayagan ito nang magpaalam at sabi pa raw ni Ms. Wilma Galvante, puwede siyang mag-promote ng Star Cinema movie sa shows ng Siete.

Source: The Philippine Star

Copyright © 2005 - 2008. Telebisyon.net. This article is a copyright property of The Philippine Star. This page serves as an archived copy of the article written by Pilipino Star Ngayon. All rights reserved. No part of this website shall be copied or reproduced in any means possible without explicit permission from the owners.