Jennylyn nakakabayad pa sa mga utang

Author: Aster Amoyo
Column: Rated A

Personal na pinabulaanan ng nanay-nanayan ni Jennylyn Mercado na si Mommy Lydia na hindi na nagkikita at nag-uusap ang magkasintahang Jennylyn Mercado at Patrick Garcia kung kelan pa naman mas kailangan ng aktres ang kanyang nobyo. Ayon kay Mommy Lydia, pinupuntahan at nagkikita pa rin naman daw sina Jennylyn at Patrick pero hindi nga lamang araw-araw dahil may trabaho rin si Patrick.

Dahil two months at maliit pa naman daw at hindi pa halata ang tiyan ni Jennylyn, nakukuha pa nitong mag-guest sa iba't ibang programa ng GMA kung saan siya contract star. Gusto pa rin daw magtrabaho ni Jennylyn hangga't kaya niya.

Dahil buntis, isang taon na hindi aandar ang kontrata ni Jennylyn sa GMA at magiging aktibo lang muli ang kanyang kontrata pagkapanganak niya.

Dapat sana'y magi-expire na ang kontrata ni Jennylyn sa GMA Artist Center ngayong Pebrero pero may one year extension umano ang kontrata nito sa GMA.

Sana lamang ay matulad si Jennylyn kay Valerie Concepcion na matapos magka-baby ay binigyan pa rin siya ng panibagong pagkakataon ng GMA hanggang sa ito'y lumipat ng ABS-CBN.

Samantala, kinumpirma rin sa amin ni Mommy Lydia na binabayaran pa ni Jennylyn ang kanilang bagong nilipatang bahay. Labas-masok naman ng hospital ang ama-amahan ni Jennylyn na si Daddy Roger dahil sa kanyang sakit na diabetes.

* * *

Isa si Leo Valdez sa mga orihinal na talents at pinakamatagal na hinawakan ng namayapang talent manager, writer, stage director, teacher at isang kaibigan na si Angie Magbanua.

Nasa Australia umano si Leo nang mabalitaan nito ang nangyari sa kanyang dating manager at matapat na kaibigan. Labis na nalungkot si Leo sa maagang pagkawala ni Angie lalupa't matagal niya itong hindi nakita. Nasa Australia si Leo dahil sa Miss Saigon kung saan siya (Leo) pa rin ang gumaganap sa papel ng Engineer.

Bukod kay Leo, ang matagal ding minanage ni Angie ay ang mang-aawit na si Dulce. Unknown to many, naging manager din si Angie nina AiAi delas Alas, Miguel Vera, Janet Basco, ang magkapatid na Rannie at Lance Raymundo, Jen Hernandez at iba pa.

Sa loob ng isang taon at apat na buwan ay naitago ni Angie sa publiko na siya'y may karamdaman. Sumasailalim na siya ng dialysis tatlong beses sa loob ng isang linggo at umabot na ng mahigit milyon ang kanyang gastos.

Nung nakaraang January 15, muling bumalik ng FEU Hospital si Angie para sa kanyang regular dialysis pero hindi siya nakauwi ng buhay dahil patuloy ang panghihina ng kanyang katawan hanggang sa siya'y tuluyang bawian ng buhay nung gabi ng January 18 sa ganap na ika-7:55.

Sadyang mapagbiro ang tadhana. Malakas ka ngayon pero bukas ay puwedeng wala ka na. Isa itong paalala na sa anumang oras na tayo'y Kanyang gustong bawiin at tawagin ay wala tayong magagawa. After all, lahat ng bagay dito sa mundo ay hiram lamang natin sa Kanya.

Source: The Philippine Star