Kapuso actress muntik nang makawala sa GMA

Author: Pilipino Star Ngayon
Column: About Showbiz

Muntik nang lumipat sa ABS-CBN ang isang Kapuso talent kundi nahabol ng GMA Artist Center, kung saan ito nakakontrata. Ang director ng isang show ng young actress, sana ang magdadala sa kanya sa kabila nang malamang magtatapos na ang kanyang kontrata this month. In fact, ipinakita na ni direk ang profile ng young actress sa isang taga-Dos na naging interesado sa young actress.

Hindi man kalakihang artista, malaki pa ang iuusad ng career ng young actress, mabigyan lang ng right project and exposure. Determinadong sumikat at magtagal sa showbiz ang young actress, hindi lang alam kung paano't hindi kalakihang role ang ibinibigay sa kanya at madaling nawawala ang character sa mga ginagawang serye.

Kaya, hindi ito masisisi kung iniisip na lumipat 'pag nag-expire ang kontrata sa GMAAC, lalo't may director na tutulong at naniniwala sa kanyang kakayahan. Pero, bago pa siya makalipat, ipinatawag at miniting siya ng GMAAC at naging maganda ang pakikipag-usap nito sa kinauukulan. Ang latest, hindi na siya lilipat at may bago na siyang primetime show.

* * *

Matutupad ang wish ng dumaraming fans nina Lovi Poe at Jolo Revilla na mapanood silang magkasama sa isang show, dahil sila ang second love team sa TV remake ng Kaputol ng Isang Awit. Dahil magkasama sa trabaho, hindi na mapapagod si Jolo sa pagbisita kay Lovi at may rason na rin siya para magbabad sa taping.

Si Lovi ang magpo-portray sa role na ginampanan ni Gary Valenciano sa Viva Films movie and it would be interesting to know, kung paano ang ginawa ng mga writer na gawing babae ang dating role ng isang lalake.

Si Glaiza de Castro naman ang gaganap sa role ni Sharon Cuneta at siguradong 'pag nag- klik ang Kaputol ng Isang Awit, masusundan pa ng ibang movies ng megastar ang talent ni Manny Valera. Si Marky Cielo uli ang makaka-pareha ng young actress sa Sine Novela na papalit sa My Only Love.

* * *

Tama ba ang dinig namin na magkakaproblema ang pagsasama sa pelikula nina Marian Rivera at Jake Cuenca sa Regal Entertainment? May komokontra sa pagsasama ng dalawa't hindi raw mapo-promote ng husto ang pelikula dahil sa grumagrabeng network war between ABS-CBN and GMA-7.

Hindi papayag ang Ch. 2 na mag-promote si Jake sa Ch. 7 and vice-versa. Magkakanya-kanya sila ng promotion at ano nga naman ang magiging labas ng pelikula? Kaya, para hindi na mamurublema, this early, may mga humahadlang na sa project, kung saan, kasama sana si Dennis Trillo.

* * *

Nakakatuwa't simula pa lang ng 2008, dalawa na ang winners ng P1 million sa Eat Bulaga. Nanalo si Jay-ar Rendiza ng P1. 055. 000 sa Itaktak Mo o Tatakbo portion ng show at ganung halaga rin ang napanalunan ng kanyang home partner na si Virginia Bocomo ng Gagalangin, Tondo, kaya't more than P2 million ang napamigay ng show.

Sa kabilang banda, nabalitaan naming anytime this year, aalis na naman ang grupo ng Eat Bulaga for Dubai, dahil pinababalik sila ng mga Pinoy na hindi sila napanood the first time mag-show sila roon. Ang Orbit TV ang nag-imbita sa hosts at mainstays ng show at hindi lang sa Middle East sila pupunta , kundi sa iba pang lugar na maraming Pinoy na nami-miss sina Tito, Vic and Joey at buong barkada ng noontime show.

Source: The Philippine Star