MARIAN AT ANGEL NAGYAKAPAN! Relasyong Marian-Dingdong mas tumindi!

Author: Jun Nardo
Column: I Know Better!

Trabaho at saglit na bakasyon ang puntirya nina Marian Rivera at Dingdong Dantes ngayong nasa Singapore sila at pagkatapos naman ay sa Malaysia ang destinasyon nila.

“Ni-request kasi kami ng mga tao roon para sa Dyesebel, kasi parang nalagay na siya sa DVD. Tapos, ni-request uli ng mga tao na makita uli kami together.

“So dalawang araw kami sa Singapore at dalawang araw sa Malaysia. Tapos, uwi na rito at taping uli! Ha! Ha! Ha!

“Naghahabol kasi kami, dahil masyadong madugo ang Darna!” pahayag ni Marian nang pumasyal kami sa taping ng series sa Plaridel, Bulacan.
Magiging bahagi rin ba siya ng Starstruck audition sa Singapore?

“Si Dong lang ang may Starstruck. Nakakahiya namang ma-involved doon. May mga cast na maghu-host doon,” sagot ni Marian.
Sa Darna, papasok sa series sina Katrina Halili at Dennis Trillo, pero ayaw munang magbigay ng de­talye ni Yan-Yan.

Pero, bakit nga ba mukhang pumayat siya dahil sa suot niyang costume, super-umbok ang kanyang boobs, huh!
“Ha! Ha! Ha! Siyempre pag payat, ganoon talaga!
“At saka, mas finit namin 'yung costume dahil medyo lumuwag! Kaya mas gumanun siya (lumaki ang boobs niya).

“Tapos, nagkalagnat ako ng three days. Heto nga may sipon pa ako, kasi hindi maiwasan dahil naka-bra at panty lang ako, eh, mahamog!
“Siguro parte lang ng trabaho 'yan. At least ngayon, gumagaling na uli ako ng konti,” paliwanag ni Marian.

Kung hindi man matutuloy ang filmfest movie sana niyang Nieves, masasabi kaya niyang itong darating na Christmas ay kanyang happiest, merriest at loveliest?

“Siguro, oo! Na-realize ko na habang nagtatagal ako sa showbiz, nagma-mature ako. Kaya minsan, sabi ko, 'Ay, hindi na ako bata!'
“Pangalawa, ang dami kong nalampasang intriga kaya naging strong ako.
“Pangatlo, okey kami sa family ko, lola ko, mommy, papa ko. Sana nga mabigyan kami ng chance na magkita kami.

“Kay Dong, okey kami. Masaya kami. Walang pagbabago at alam kong alam mo 'yan! May sinagot siya sa 'yo.
“Panglima, wala na akong naririnig na intriga sa akin. Lahat maayos na. Open na!

“So, happy ako dahil lahat ng bagay, pumupunta sa kanya-kanyang puwesto,” kuwento pa rin ni Marian.

So, walang ginagawa si Dingdong na ipagseselos niya?
“Wala talaga, eh. At saka, mas dumoble nga ang pag-alala niya, pagtawag niya, at pakikipagkita niya. So, wala talagang dahilan!” mariing sabi ni Marian.

Ang sarap naman!
“Alam mo 'yannn! May interview sa kanya!” mariing say pa rin ni Marian tungkol sa nakaraang sinulat namin dito sa Abante.
Eh, sa tsismis na ang babae raw ang lumalapit kay Dingdong, nagri-react ba siya?

“Wala naman akong naririnig na may ibang babaing lumalapit sa kanya. At saka, wala naman! Trabaho lang 'yon gaya ko dito sa Darna. Ganoon din siya. Basta ang importante, kaming dalawa ay okey,” deklara ng young actress.

Eh, ano ang masasabi niya sa humihiling na magsama silang muli ni Dong sa bagong series?
“Sana dahil na-miss ko rin siyang katrabaho. Kung mangyayari 'yon, pagbubutihin naming dalawa.”

May oras pa ba sila ni Dong na lumabas?
“Pinipilit namin hangga't kaya. Kunwari, may pictorial ako at tinatanong kung saan ako, nagyayaya 'yon. Never kaming nawalan ng communication o 'yung hindi nagkikita ng one week. May time talaga kami!” kuwento ni Yan-Yan.

Best friend din bang maituturing niya ang actor?
“Oo! Alam niya lahat, eh! Ha! Ha! Ha!
“Wala akong tinago. Maski siya, alam niya lahat ang nangyayari sa akin at alam ko rin ang nangyayari sa kanya. Alam niya ang nangyayari sa akin sa shooting.”

Paano niya idi-describe ang relasyon nila ngayon?
“Siguro naging mas matindi siya! Mas naging matured kami parehas. Mas naintindihan namin ang isa't isa. At saka, wala, happy lang talaga. Saka happy kami dahil nandiyan ang isa't isa para magsuportahan!” paliwanag niya.

Teka, bakit wala pang kumpir­masyon mula sa bibig nila sa relas­yon nila?
“Anong kumpirmasyonnnnn?” impit niyang sagot.
“Siguro, hindi na kailang i-broadcast na ganito kami. Nakikita naman ng tao kung anong klaseng sitwasyon o kung anong meron kami ni Dong. Mas maganda 'yung tahimik at mas importante 'yung masaya kami at maraming taong natutuwa kung anuman meron kami.”

Ayon pa kay Marian, hindi porke sweet sa kanya si Dong, 'yun na ang kaganapan ng kaligayahan. 'Yung pag-effort ng actor na pas­yalan siya at bigyan ng oras na makipagkita sa kanya ay ina-appreciate na niya nang sobra-sobra.

Teka, may balitang nagkita at nagkausap sila ni Angel Locsin. Kumusta ang pagkikita nila?

“Nagpunta siya sa bahay ni Popoy (manager ni Angel) at doon kami nagkita ni Angel. Kumustahan. 'Thank you, Lord, dahil nagkita tayo!' Matitigil na 'yung sinasabing hindi kami magkasundo. Picture-picture kami. Hug! Hug!

“Sabi ko din sa kanya, thank you. Thank you din siya sa akin dahil tinulungan ko siya sa auction niya,” kuwento ni Marian na ibinigay ang kanyang yellow gown, damit na sinuot sa concert sa Amerika at bag.
More on Marian sa pagkikita nila ni Angel at ang iba pang kaganapan ng relasyon nila ni Dingdong!

Source: Abante

Copyright © 2005 - 2009. Telebisyon.net. This article is a copyright property of Abante. This page serves as an archived copy of the article written by Jun Nardo. All rights reserved. No part of this website shall be copied or reproduced in any means possible without explicit permission from the owners.