Marian isampok kang Cristine

Author: Sun.Star
Column: Davao, Kalingawan

GIKABUTYAG nga sila si Marian Rivera ug Cristine Reyes ang mag-abot sa timeslot sa primetime sa GMA ug ABS-CBN.

Si Cristine, may sikat nga 'Eva Fonda' sa ABS-CBN ug giingon nga sa maong oras sab ipasulod ang bag-ong serye ni Marian kauban si Dingdong Dantes nga "Ang Babaeng Hinugot Sa Aking Tadyang." Kini, mao ang giingong pangpatay sa GMA sa 'Eva Fonda.'

Since usa ka sexy nga teleserye ang Eva Fonda ni Cristine, gilauman nga di sab daw magpa-ores dinhi si Marian nga nanaad nga usa ka mature nga role ang iyang dalhan alang sa serye.

In short, mopakita sab siya og skin sama kang Cristine nga nahimong pantasya sa kalalakin-an tungod sa 'Eva Fonda.'

Una nang nanggawas ang taho nga mahagba ang career nila ni Dingdong ug Marian karong tuiga.

Apan si Dingdong, nagsulti nga di siya nagatuo sa mga predictions. Alang niya, ang tawo ang nagahimo sa iyang kapalaran.

Apan kung tinuod nga mahagba ang career sa sikat nga loveteam from GMA, masulti kaha nga si Cristine Reyes ang mopatumba kanila?

Kahinumduman nga kanhi sab GMA talent si Cristine apan wa gayud mahatagan og igong exposure. Wa sab matud pa mapakita ni Cristine ang iyang abilidad sa pag-arte.

Sa iyang pagbalhin sa ABS-CBN, gidugok og mga projects ang dalaga ug lakip na dinhi ang international series nga 'Kahit Isang Saglit' ug karon, ang 'Eva Fonda.'

Source: Sunstar Daily